አዲስ አበባ፣ ጳጉሜን 3 ቀን 2016 ዓ.ም ኢ.ፌ.ፖ.ሚ፡- የሉዓላዊነት ቀን “ኅብር ለሁለንተናዊ ሉዓላዊነት” በሚል መሪ ሀሳብ በመላ ሀገሪቱ ተከበረ፡፡

ክቡር የኢ.ፊ.ዴ.ሪ ምክትል ጠቅላይ ሚኒስትር ተመስገን ጥሩነህ በሣይንስ ሙዚየም ተገኝተው በበዓሉ ላይ በአደረጉት ንግግር ኢትዮጵያ እስከ ዛሬ ድረስ ሉዓላዊነቷ የተከበረና የታፈረ ሆና እንዲትኖር ያለ ስስት ውድ ሕይወታቸውን የሰጡ፣ደማቸውን ያፈሰሱና አካላቸውን ያጎደሉ ብሎም በልዩልዩ መስኮች የሀገራችን ሉዓላዊነት እንዲጠበቅ ያደረጉ ዜጎች ሁሉ ልናመሰግናቸው ይገባል ብለዋል፡፡

ክቡር ምክትል ጠቅላይ ሚኒስትሩ ሉዓላዊነት በደምና በላብ የሚጠበቅ እሴት ነው፡፡ የሀገርን ዳር ድንበርና የወገንን ክብር መጠበቅ የሚቻለው በደም መስዋዕትነት ነው፡፡ የፖሊሲ፣ የኢኮኖሚ፣ የዕውቀት፣ የቴክኖሎጂና የበጀት ሉዓላዊነትን ማስከበር የሚቻለው ደግሞ በላብ መሆኑን ተናግረዋል፡፡

የኢ.ፌ.ዴ.ሪ ሀገር መከላከያ ሠራዊት እና የኢትዮጵያ ፌደራል ፖሊስን ጨምሮ 7 የፌደራል ተቋማት በጋራ አፈ ጉባዔዎች፣ ሚኒስትሮች፣ የኢ.ፌ.ዴ.ሪ ሀገር መከላከያ ሠራዊት ከፍተኛ ጀነራል መኮንኖች፣ የኢትዮጵያ ፌደራል ፖሊስ ምክትል ኮሚሽነር ጀነራሎችና ረዳት ኮሚሽነሮች እንዲሁም የፌደራል ማረሚያ ቤት እና የአዲስ አበባ ፖሊስ ኮሚሽነሮች በተገኙበት በሣይንስ ሙዚዬም በፓናል ውይይት ተከብሯል፡፡